Ceci est l'éditorial n° 98     Liste des éditoriaux     Retour accueil     Dernier numéro

S'apesar !

Coma o sabètz, la revista Lo Convise es urosa de presentar de tèxtes d'autras regions occitanas, provençaus (mercé Provença inspirada !), gascons e altres quand es possible, occitanistas generals... E mai, coma al temps del bon Teiriç Òfre around the world, una escritura desterritorializada nos fariá pas fasti.

Mès avèm tanben un territòri de referéncia, d'enrasigament, que cal entreténer : l'Auvèrnha. Aquí, mercé Zefir Bòsc (qu'oblida pas lo puèg de Bana), Fèliç Daval, Lutz e son òme (pardí !), Andriu Balthazar, còla espalancada pel temps, pecaire, mas ont de novèls arriban, Monica Freissinièr, tu, legeire.

La preparacion del quatren quasernet del Convise, vosat a Enric Gilbert, a son Covize, a L'Alauza d'Auvernha nos a fach sentir que seriá pas mal d'alargar lo zom auvernhat fòra Cantal, de daissar una pichona plaça a la geografia, a la literatura de las Limanhas, del Liuradés, de l'Ambertés, del Velai, forra-borra les Fraires Pasturel, Ftancés Pesant, Amable Faucon, Antòni Roy (dich de Gelles), Charles-Antòni Ravel, Benezet Vidal, Michalias, Jarsaillon, tota la cordilhada… I a de ligams entre l'airal cantalés, lo Puèi de Doma e l'espaci altiligerian pus efectius qu'òm crei : Loís Delhostal, Loís Debrons èran pas los darrièrs a se desplaçar delai Lempdes ; Loís Levadoux jove surprend a Clarmont per sa precocitat. Pas ne'n parlar es pas d'un bon Auvernhat e desrasiga la cultura nòstra.

La novèla region nos convida a percebre mièlhs l'ensemble Auvèrnha-Velai e mai, a agachar val levant. Lo franco-provençal comença ja de sedusir d'occitanistas que i a, diversitat oblija, e ieu quitament, ai totjorn ressentit quicòm dins los paisatges del Forez, sens parlar de l'influéncia de Sant-Estève suls bals de Lèira-Nalta, de l'atraccion lonhdana de Lion… Aquò segur per s'apesar, un bocinon, a cha pauc, sens se foraviar, sens cambiar l'anament ni las opcions de la revista del Convise.

Nadal Lafont

1 s'apesar : se donar del pè.