Ceci est l'éditorial n° 93     Liste des éditoriaux     Retour accueil     Dernier numéro

Calidoscòpi 2016

L'autre jorn anave a la banca quand una esclairada levèt la bruma qu'engrisalhava la vesprada. L'ensenha blava del Mercat provençal semblèt s'estaloirar sul pargue en ranimar un filigrane de sovenirs. Convisaires aborius que ja parpandejavan près de l'autò, convisaires pas panats, l'un amb la casqueta, l'autre lo berret… Un, que se jai tard, uèi es pas tardièr, s'entend pas dire qu'es a l'ora coma las dalhas per Nadau mès, suavament : " Adiu, Glaudi, ès tombat del lièch, aqueste matin ? " Amistanças matinièiras, plasers de convise… Longtemps en efècte, per una sortida d'una jornada, lo primièr rendètz-vos s'es fach juste après l'endejun davant lo Mercat provençal, apellacion que per nautres aviá mai de morre que Leader Price, lo magasin discount d'a costat.

Nòstra vida es una limfa d'imatges, en negre e blanc o en colors, que nasejan a l'ocasion, mas tanben de raives, d'idéias, de projèctes d'avenidor que miralhejan e endrudisson nòstra accion. Es la meula consubstanciala decont nais nòstre perlongament de deman. Una lenga es tanben una estenduda de fenèstras per agachar lo monde e ne'n gausir, la nòstra especialament : deçai l'escuròu, delai la raboneira, mès totjorn la vida. Aquí un òme d'atge que paupeja lo subjontiu coma un vièlh roman. Après la lutz, una autra lutz… Après lo puèg, una pastora modernista…

Segur, aquel epicurisme pòt pas sufire a l'aparament metodic d'una lenga mès aquí, la carta de las lengas regionalas, sabèm quau la prepausèt e quau l'a pas votada. La tèma d'exclusion es pas çò que cal, tant mens que se tracta aicí del patrimòni nacional, d'un umús irisat nòstre. Per èstre un bon politic, cal fòrça engenh, far anar la muscada, aver tal Mossur Dròp l'intelligéncia des corrents d'èr e dels vents, e totjorn d'intuicion. Se dison de vos " es sord dusca miègjorn", es pas un defaut mès se vos parlan 'identitat' et que comprenguessiatz 'comunautarisme', aquí sètz sord coma un pegau. Podètz tornar nàisser !

Braves amics, melhors vòts ! Que l'annada novèla faga lume ! Ajustem quauques rebats novèls al calidoscòpi de las annadas passadas !

Nadal Lafont.