Ceci est l'éditorial n° 92     Liste des éditoriaux     Retour accueil     Dernier numéro

Un veïcul " normal " de l'informacion e del debat

L'escomesa fondairitz de la fondacion del Convise en 1992 èra la ligason possibla entre dos caminaments, la fònt populària viva en colors (captada pels convises) d'un pan, la cultura esclairada a de sorgas modèrnas de l'autre. Lo besonh de vertat enraiçada al país es estat pro atestat sens suspresa pel succès de las brocaduras de las Femnas d'Aubespèira, del Diccionari carladesenc de Maurici Dèsa, de las Pescas d'Òlt de Zefir Bòsc… lèu agotats. Una apròcha scientifica a acertat tanben ambe la bona venda dels obratges de Rogièr Teulat, que encombran gaire los tiradors. Maldespièch quauquas calçatrapas gelosas, lo public a validat l'orientacion de l'associacion, distincta del rabusatge de bona fe e del cenacle d'intellectuals o d'ideològs.

Lo Convise s'es caracterisat tanben per la causida de comunicar e d'esclairar dels pans entièrs del patrimòni regional mal accessibles o daissats darrièr. Dempuèi 25 ans, aquò s'es fach metodicament, sens fum ni lum, dusca a la publicacion actuala de la Mesa a jorn 2009-2015 dels Écrits occitans cantaliens que marca lo tèrme d'aquel tipe de contribucion1 per çò que nos concernís. Lutz e ieu sèm contents d'aver alestit aquel obratge atal completat que ditz un amor de la cultura d'òc e que restaca tant de fidèls de la lenga nòstra a la continuacion desirada que s'alanda jos nòstres uèlhs.

Ambe la novèla politica de descentralizacion lingüistica qu'es anonciada en França, la posicion de l'occitan deuriá cambiar. Escotessiam pas l'inversemblabla coalicion dels repapiaires increduls. Mirgalhem, salpiquem nòstre lengatge de flors d'òc per acompanhar lo movement e digam ambe la letra setmanièra d'Aquò d'Aquí que nòstra lenga es un veïcul " normal " de l'informacion e del debat.

Nadal Lafont.

1 Demora enquèra a far lo rendut-còmpte de quauques convises remarquables, entre tantes.

Lo Convise : une approche enracinée conduisant au monde d'aujourd'hui.. Des racines au monde d'aujourd'hui