Ceci est l'éditorial n° 80     Liste des éditoriaux     Retour accueil     Dernier numéro

LA ROTA DELS QUATRE CONVISONS

Aquò-l-i 's, Lo Convise associacion a franquit lo cap dels vint ans, l'anniversari s'es plan debanat, òsca a totes les convisaires qu'aun tengut la rota per far l'eveniment, mercé a Eitrac e a l'encoratjament cantonal.

La recompensa mai bèla es venguda de quauques òstes primadièrs (1) que son venguts malgrat l'atge, dels còps, e les quilomètres. D'autres, dins l'impossibilitat de se desplaçar, son estats tocats per nòstre sovenir piós e an mandat de letras esmoventas. Cars convisaires inoblidables, per vòstre acuèlh e las valors frairenalas que portatz, donatz lo sens de l'aparament de la lenga nòstra.

La serada del vendres es estada marcada per l'espectacle de contes de l'estonant Duò d'Òc, las cançons agradivas de la Corala del Convise e las remarcablas prestacions de Glaudi Descombèls e d'Amelia Castèl tan plasenta qu'excepcionala de virtuositat. L'amor de la lenga d'òc passa tanben per l'illustracion, la recèrca del mièlhs, lo besonh de se despassar.

Amb la messa de l'abat Loís Irlanda, figura luminosa, la vesprada del Terradour Flouricat, esbleugissent de movement, lo bufet e lo vin dal Fèl, lo sabte es estat una plena jornada de rescontres, de presents, de sovenirs e de retrobalhas…

Mas conviccions aun pas cambiat mas l'innocéncia aventurosa de la partença del Convise a laissat uèi la plaça a un sentiment difús que n'es pas la serenitat, ont la certituda de las bonas òbras se pomèla de quauquas languisons de figuras remirablas, disparegudas o demenidas, que nos aun rassemblats un temps e nos assòcian dins nòstra istòria.

En Auvèrnha, lo Temps desròca pèira a pèira

Les castèls que n'aun plus de merlets, de pebrièira.

Lo Convise jove es estat portat pel Felibritge de Joan Fay, l'occitanisme modèrne de l'IEO. Saber se lo mondialisme desforrelant escafarà los patriotismes regionals o les reviudarà en reaccion ? Lo monde e los politics son confrontats a talament d'urgéncias que lo vam de l'emission Viure al país en 1981 es de mens bon imaginar uèi per uèi. Sul compte, vesèm l'occitan a l'escòla que mèrma e d'absurdes guirguilhs reïnstillats. Barra en avant ! Nos cal reïnventar la fe. Quatre cançons, quatre convisons pòdon pas èstre nòstra consolacion. Nadal Lafont.

1 Entre aquelses : Madama Vigne (de Lapeiruga), Natalia Poujol de las Femnas d'Aubespèira, familha Loís Gibiards del Blu, Guiral Rossiès, Pèire Montimart, Andriu Lafon, familha Fay, familha Pèire Dufour, Maria-Elena Ricard, Gerard Bioulac, Anna-Maria Lobièra, Familha Dalbin d'en Vièla, Familha Serieys de Roanas, Joan-Pèire Estabèl (fotòs), Miquèl Picard, Bernadeta Faucher, familha de Paul Nureau e de Natalia Nureau nòstra Mionèla en 1997, familha d'Odeta Lejoly, Ubèrt Caumes, familha Pèire Landes, Jòrdi Maurici Maurí, Zefir Bòsc segur…

 

.

Lo Convise. Bilan de 20 années d'existence. Reconnaissance émue à tous les hôtes et animateurs

Duò d'Òc. Amélie Castel