Editorial n°8        Liste des éditoriaux     Retour accueil     Dernier numéro

Ara que se parla del Convise, de monde demàndan de rensenhaments sus l'orientacion generala de l'Associacion, las tòcas... Ieu tròbi pas totjorn los mots per o dire, parli d'ostal dubèrt, d'idèias largas... Ambe lo reculament que dona l'escrich, aquí cossí vesi los convisaires mas, solide, cada aderent deu veire lo Convise segon sos raives, sos espèrs... Que maites faguèsson coma ieu...

Los convisaires àiman la lenga nòstra, que la practíquen, l'apréngan o desíren simplament son salvament. Sénton que l'aparament de la lenga occitana es ligat a d'enjòcs esconduts mas importants.

Pàgan l'escotisson per encoratjar una societat que en pauc de temps a fach la pròva de sa valor culturala e sociala.

Sàbon metre lo passat occitan en perspectiva critica, mas 'quò los empàcha pas d'èstre fièrs sovent de lor patrimòni e de lors aujòls quand an plan fach. Tot grope uman a lo drech de conéisser son istòria sens qu'òm li faguèssa un procès en passadisme. Los martinaires e los pairolièrs d'Orlhac nos dónan una leiçon sana : lo monde del país an agut de vam, d' idèias, de tradicions manualas, tecnicas, comercialas, artisticas, capitàvan e èran capables de s'amodar sus las rotas europencas : èran del monde portaires. A nautres de ne'n faire atretant uèi per uèi.

Los convisaires créson a la reflexion personala mai qu'al preste-a-portar de la pensada e cèrcan totjorn a ne'n saber mai. Son curioses del monde d'uèi e l'estúdian. Se demàndan de qué manca a nòstre temps, cossí podriá èstre pus gente e ensàjan d'associar la lenga d'òc a las innovacions e amelioracions desiradas. Sénton que cadun, a sa plaça, pòt contribuar a l'istòria de son epòca e i trobar un biais d'emergéncia personala. Las activitats e los plasers del Convise son una figura d'aquel amodament.

Lutz.