Ceci est l'éditorial n°79     Liste des éditoriaux     Retour accueil     Dernier numéro

POËSIAS DE NORIB

(Sant-Flor, 24 de mai 2012)

Aquò l-i 's ! Lo 1èr tome de l'Integrala de Pèire Biron, intitulat Poësias de Norib a conegut sa sortida oficiala lo 24 de mai als Archius municipals de Sant-Flor, bailejats per Giles Albaret, en preséncia de Sandrina Daureil animatritz de 'Sant-Flor País d'Art e d'Istòria'. La corala del Convise, dirigida per Glaudi Descombèls, a enlusit aquela manifestacion en interpretant Lo Credo del Païsan (musica de Gustave Goublier en 1890, paraulas d'Estefan e Francisc Borel) e La Sanflorana, cançon de Pèire Rainal (amic de Biron) que los Panchals tornèron descubrir ambe plaser.

Joan Jouve de Lobaressa, collaborator-ressorça per la traduccion, Danièl Brugès de Nòvaglèisa, illustrator de l'obratge, èron aquí. Un autre plaser bèl foguèt la venguda dels occitanistas qu'avián ja trabalhat per la memòria de Biron e al Centre Norib : Patric Bèc musician, Joanina Duverny (aliàs Joanina Bernat), Gui Brun museograf, Iveta Brun, Cristian Omelhièr diccionarista de l'auvernhat, lo margeridian Paul Antony... La preséncia luminosa de Cristiana Boutevin " Julieta ", rèira-coarra dels Archius, rapelava los moments urós de la recèrca de Norib pels jornals.

'Sant-Flor País d'Art e d'Istòria' a botat Pèire Biron en avant dins sa comunicacion coma escrivan de l'annada 2012 :

Dins lo bèç, lo fraisse e lo vèrnhe,

Lo vent clapet plora e se'n vai ;

Qu'es brave mon país d'Auvèrnha

Quand ven la fin del mes de mai !...

(P. NORIB )

Doas sassigadas de legida tendràn luòc a Anglards de Sant-Flor (28 d'agost : Norib celebrant lo monde païsan) e Sant-Flor (13 de novembre : La natura e Norib) ambe lo diseire e contaire Desdièr Huguet.

Lo President del Conselh Regional a mandada una letra de felicitacions a las Edicions del Convise.

Nadal Lafont.

.

Poësias de Norib.. Poésies de Pierre Biron