Ceci est l'éditorial n°77      Liste des éditoriaux     Retour accueil     Dernier numéro

Emploiem plan nòstra vida

A totes les convisaires e als amics de la lenga nòstra dise Bona annada 2012, plan granada e acompanhada, segur !

L'aculhissèm ambe fofa aquel novèl espaci de temps occitan que nos es donat e n'avèm pas cap d'enveja de tornar 50 ans en rièr. Nos dison ben que se caldrà sarrar un pauc les correjons e que n'avèm benlèu un pauc tròp profitat. Se quò' s vertat, sèm pas tot sols mès, rai, n'avèm pas paur e nos plangèm pas. Quand Pèire Biron desirava generosament la bona annada en 1905, se contentava de dire :

…Bona annada.

Portatz-vos totjorn bien, tenetz bon se podètz

Crenhassiatz pas la mòrt pas mai que la bofada,

Botatz de boès al fuòc per passar la velhada

E d'òli a vòste lum per legir mon patoès.

La lenga occitana nos ajudarà ambe sas raices prigondas qu'esclairon nòstra plaça dins l'univèrs e d'idèias nòvas a metre en òbra per enlusir l'avenir. Per lo Convise, 2012 sera una data anniversària e l'annada Norib, lo que nos ditz dins son Èr de cabreta :

Bofem dur, coarro o lauraire !

Conflem-lo nòste instrument !

Amusem-nos un moment,

Laissem les socits de caire…

 

Al son clar de ma cabreta,

Dança, ò brava Margarita !

Lo dimenge n'es pas luns.

 

Emploiem bien nòsta vida,

Pesque, quand serà partida,

Beurem ni chantarem plus…

Chas Norib, emplegar bien sa vida es pas lo monilh-corta vista, es pas solament lo carpe diem dels ego, es obrar e s'amusar sens gastar lo plaser païsan de la recòlta, sens tornar sortir del tirador de vièlhas garrolhas. Los que se partiguèron perdeguèron.

Nadal Lafont.

Pierre Biron. Norib