Ceci est l'éditorial n°74       Liste des éditoriaux     Retour accueil     Dernier numéro

A la fin de l'ivèrn, quand les premiers signes de la prima fan puntets dins la natura, aime tornar fulhetejar La montanha negra, aquela benda dessenhada realisada pels escolans d'occitan del Collègi de La Ròca pendent l'annada 1991-92, endralhats per lor professor Rogièr Chevalier, d'après lo conte de Joan Bodon. Aquela legida s'acòrda plan a las promessas d'abril ambe sa referéncia a las prigondors populàrias e literàrias, lo bèl estrambòrd de la joinesa ajudada per d'adultes esclairats, la fe pedagogica dins l'escòla que duèrb a nòstra lenga les camins modèrnes e l'avenidor. Puslèu qu'una medalha de parada, tant de vertat e tant de fe merita admiracion, reconeissença, emocion.

Mens de 20 ans après, ara que l'òfra occitana de las escòlas merma, pecaire, de tals miracles se'n trobarà pas coma de botaròts pels bòscs.

Alèra me vire vas Pèire Biron, lo boièr Norib, que passèt pas qu'un ivèrn a l'escòla de Sant-Flor, que las secadas, lo meissant temps e los auvaris esparnhèron pas, mès que d'esperel anava a las fònts classicas grècas, als pintres, a Tolstoï, a l'actualitat completa de son epòca, abeurant la Planesa de pensadas nòblament generosas e de poësias pendent quasi 45 ans, dins la companhiá de la polida vacheirona, del grelh amistós, ambe l'independéncia clarvesenta de la tèrra… Prima d'Anglards, per ieu, prima de trabalh !*

Nadal Lafont.

La Montanha negra : la planca 2 d'aquela benda dessenhada es donada pagina 4 de cobèrta

La vacheirona : la pastorèla, la baticoa

Anglards-de-Sant-Flor : la bòria de Pèire Biron èra a La Gasèla (comuna d'Anglards-de-Sant-Flor)

Trabalh : mot prononciat [trabarh] en Planesa

*Nadal Lafont es a preparar l'edicion de l'integrala de Pèire Biron que se revèla bograment voluminosa e que serà editada pel Convise a la fin de 2011.

Roger Chevalier, Pierre Biron, Norib, Anglards-de-Saint-Flour