Editorial n°72       Liste des éditoriaux     Retour accueil     Dernier numéro

Amics legeires, dins l'immensa modestia que dicta la consciéncia de las causas, aquel numerò 72 m'agrada e es digne de vautres : plan enreiçat en Auvèrnha, sens localisme reduseire, me sembla virat val public d'uèi interessat per la lenga.

Lo poèma de Fèliç Daval, inspirat pel brau d'Aubrac, es a prendre lo camin de la cançon e de las ondas. Lo Jòrdi Maurici Maurí, ara plan conegut per sas Rabusadas e sa Reiç de reviure tròba una novèla rega amb son teatre municipal. Ambe l'expleitacion de las diatomacèas a Auxilhac, Màrius Lherme nos rensenha sus un tròç de l'economia cantalesa e, per deduccion, nos dòna idèia d'anar veire la narsa de Nauviala tant qu'es temps. Quau de mièlhs cantalós que Joan Vesòla ? sos tèxtes son totjorn presats e demandats coma lo rit de la Maire Miquèla. En mai, trobaretz aicí un document artensièr desconegut que rensenha sus un certan aspècte de l'escrich populari impublicat.

De vesins pròches son presents : lo Carcinòl Joan Murat qu'oblida pas lo Cantal, Zefir Bòsc que presenta lo grand escrivan del Roèrgue Enric Mouly, una referéncia per sa vida e son òbra ; Eliana Meallet la puègdomesa, un còp de mai a lo don dels subjècts…

Aquel numerò es dubèrt tanben al relarg occitan. Provença es plan representada ambe les aucèls de Sèrgi Bec, la clartat de Reinat Toscano, las coneissenças de Peireta Berengier que nos presenta un Lauseròt ! E subre lo mercat, per un còp un pauc de Gasconha ambe Evelina Auban la pirenenca que parla de son Comenge.

Segur tanben, maites articles de reflexion son l'imatge d'una cultura viventa dins lo monde d'uèi, en passar per la Bretanha o pels sendarèls de la filologia. En mai, guinhada val centenari de Vermenosa, las fotòs de la cobèrta 4 rapèlan l'eveniment alandaire que foguèt lo convise " Sus las piadas de Vermenosa " (20-06-1994).

Lo numerò s'es fach atau, sens cèrca d'exaustivitat. Mercé, braves collaborators de permetre una vision occitana que gandís nòstra cultura de l'abocinament.

Occitana sovent me prend coma una mar…

Majoral du Félibrige. Jean Fay. Zéfir Bòsc. Jean Fourié