Editorial n°69       Liste des éditoriaux     Retour accueil     Dernier numéro

Braves amics del Convise,

en veire çò que se passa per nòstra lenga e nòstra planeta, vos presenti de bons vòts de saviesa, d'èime, d'aubire, de mesura, de moderacion e, segur, de bonur per la novèla annada 2010, un crane millesim sus l'abac per ma fe.

Convisaires un pauc aluenhats, que totes sètz pas d'Orlhac, sètz mai que mai dels abonats. Saupessiatz pr'aquò que, dempuèi d'annadas, l'associacion del Convise alanda d'activitats culturalas ont, tals Òlt e Truèire a Entraigas, las fònts populària e culturala se rejonhon e s'ajustan : obrador de dança ont las coregrafias del país frairejan amb las danças de pertot per anar cranament al bal sens corset de rotina, corala de cançons occitanas, cors de lenga, literatura e civilisacion, convises per far sortir la lenga d'òc : aquesta annada començarem lo 6 de febrièr per la taulejada annadièra a Sant Paul de las Landas enginada per Jòrdi Justin un dels paires del Convise ; aprèssa, i aurà la ceremonia encigalaira del 6 de març a Eitrac ; puèi un o dos convises de prima, dont la sortida tradicionala de fin d'exercici ambe Jòrdi Maurici. Benlèu un jorn, fòra departament, quauquas personas avançaraun de proposicions, lo Convise fariá convisons, aquò seriá lo chale.

En quant a l'edicion, 2010 serà pas traça. En mai de l'Indèx general de la revista del Convise, la publicacion de l'Integrala de Pèire Biron va èstre entamenada per abotir l'an d'après ; de per abans la seguida de las Rabusadas del Suc de la Gana de Jòrdi Maurici Maurí aurà espelit.

N'ai pas granda fortuna mès cependent n'ai pro, çò nos ditz la cançon.

Nadal Lafont.

Majoral du Félibrige. Jean Fay. Zéfir Bòsc. Jean Fourié