Editorial n°66       Liste des éditoriaux     Retour accueil     Dernier numéro

L'emocion que vos sasís davant certanas manifestacions, la sinceritat dels consires relègan pel moment al rèireplan certanas demandas culturalas, mai se las causas que aun menat lo desturbe actual e las qu'explican la situacion de nòstra lenga son pas de natura talament diferenta - goapas d'argent d'un costat, irreflexions de l'autre ; e mai se, un còp l'afaire passat, es pas impossible que los òmes oblidèsson las rasons del caòs economic actual e se tornèsson comportar o daissar menar coma de davant... Albèrt Camus n'aviá l'intuicion a la fin de La Pèsta.

Coma responsa possibla a la crisa, entre autras, lo govèrn aconselha l'esperit d'entrepresa e alanda un estatut d'autò-entrepreneire que permet a cadun de venir son pròpri coarro, ambe una comptabilitat e una impausicion soplament liberadas.

L'idèia es pas tan traça per motivar las energias creativas e pòt interessar de valerós occitanistas conceptuós e actius, despiechats per l'estrechiment de la dralha educativa normala mès que podriáun arniflar quicòm de bon dins lo rapòrt cambiadís dels òmes als bens materials. L'occitanisme es totjorn estat una cèrca d'iniciativa, un despassament de la fidelitat del topinièr. Lo dispositiu d'Ervé Novelli pòt concernir tanben les locutors naturals sens estudi, depositaris de raives e d'un patés, que pòdon aver enveja de marcar lors produccions de lor sensibilitat regionala. Cadun son mestièr, cap de compausanta de la cultura d'òc deu èstre botada de caire. L'endrudiment vendrà melhor d'un sentiment d'apartenéncia cauda.

Pélou, Birlou, Tripoux (One two !) Pastissous*, découvertes occitanes, marcas d'identitat dins la vida vidanta, benananças d'aüèi, fan signe als costovins futurs sul flux celestial d'activitat.

L'estièla fa la lèbre

Per las carraus del vent…*

Nadal Lafont

*Pélou, Birlou, Pastissou del Cantau : marcas depausadas de begudas e pastisson de país lançats ambe succès a l'epòca modèrna. découvertes occitanes, librariá, 32 ciutat de Clarviure, Orlhac.

* Vèrses de Pèire Moussarie dins Nadal d'Oietz.

Noël Lafon, auto-entreprise, découvertes occitanes