Editorial n°61        Liste des éditoriaux     Retour accueil     Dernier numéro

Braves legeires, que pensaments e dificultats s'escàfen per 2008 e que lo bonur siaga aquí ! Per se sentir integrat al flux social de vida, res de mièlhs que de passar a la TV e, se aimatz rambalhar de per lo monde, que la lenga nòstra diga l'estranja beltat de las bolas loserianas del Cantal, a costat de Requistat, delà ont se devina la blavor cevenòla. Dels calandrons arribaraun en lièja esquilaira e tindoneja que tindonejaràs ! Los cargòs pesats del Caire e del Marròc tornaraun prendre lo camin de las naus anticas e de matas alangoridas velosaraun voluptuosament las cropas dels ergs. Jos los pissals del Mozambic la cabreta ressondís e nos aturam de Mosi-oa-Tunya, lo fum que rena a las bolas de la Zambia ont se tròba l'amor afric. Peninsulas desamarradas, d'amairitz londonianas i préndon lo bus furtiu. Quadratura, desacotissèm los mistèris, tot'n gardar qualques uns.

E puèi, vist d'Euròpa, i a l'estonanta mudason que se debana. Quantes de sègles, quantas de pontannadas dins lo temps per n'arribar a d'invencions tecnicas ! E vaquí ara que de frontièras s'esvanesísson, Schengen, la vida de certans pòbles càmbia en res de temps, de miracles numerics arríban de pertot sens que perdessiam la tarta a la toma… I a ben de destricotatges dolorós e d'usinas que dàissan de regret mès la governància generala es reflechida a costat de las violéncias istoricas d'ièr, de novèls equilibris predatorials s'estabilízan. Los quites postulants politics a l'alternativa pachícan per trobar una solidaritat positiva al delai dels egòs.

Ja vesidoira de nòstres asuèlhs individuals, una question de fons poncheja dins lo païsatge, la santat de la planeta. Los que comprénon sens i èstre forçats avián ja començat les pichons sacrificis de cada jorn mès ara, òm pòt pas s'en téner al sicap de cadun e cossí moderar lo descabestrament dels interès e dels apetís de viure ? L'annada 2008 val lo còp d'èstre agachada d'aquel pan. Per nòstra societat ont l'economia es prioritària, aquel sicut concernís la morala, la cultura, nòstra lenga… Banquisas irisadas dels orses blancs, garlandas eolianas, jardin secret del papach-ros dins lo martinet del progrès…

Nadal Lafont.

2008 Bonne année, prise de conscience écologique, la planète