Editorial n°6        Liste des éditoriaux     Retour accueil     Dernier numéro

L'activitat del Convise.

Lo bilanç del Convise per sa segonda annada d'existéncia autonòma es satisfasent. L'associacion a saugut sovent congrear l'eveniment ambe per exemple la mòstra dels botaròts o la jornada sus las piadas de Vermenosa, tot en contunhar de téisser, cada mesada, un ric malhum de rescontres, a la soca del país coma fòra Cantal. A reçauput de signes d'encoratjament e de confiança de personas vengudas d'asuèlhs divèrs. Ambe la publicacion de las òbras de Juli Prax, lo module d'edicion s'es afortit e lo modul d'animacion a acertat. De brave monde créson al nòstre bulletin e, chas les convisaires, de valors novèlas son aparescudas. Es la pròva que nòstra associacion a causit un bon camin e respond a una espèra.

Aquela benanança non nos fa oblidar totas las gents que, dins les temps incertans, áun rendut possible lo plaser present, nimai las associacions confrairenalas dont certans aderents d'alhors, vénon dels còps amb nautres.

L'esperit de capèla nos caracterisa pas e un convisaire deu jamai pèrdre de vista l'interès superior de la cultura nòstra.

Aquí quauquas nòvas, per pas parlar del fum de detalhs financièrs o practics examinats per aquel conselh de fin d'annada.

Lo Convise e la comuna d'Orlhac. Lo Conselh Municipal acòrda al Convise una subvencion de 2000F dins l'encastre del Fons d'Iniciativas. La question de la sala permanenta es pas encara reglada : se lo Convise es reconescut coma associacion orlhaguesa, aurá una sala ambe una renda suportabla. Si que non, caurá se servir de las salas municipalas disponiblas coma l'an passat per çò que la locacion costariá tròp.

La revista del Convise. A comptar de 94, per de rasons estrangièiras al Convise, vòstre president s'ocupa pas plus de la revista Monde en Òc. Orlhac se tròba donc gratificat de tres revistas occitanas. Lo Convise fará en sòrta de publicar solament de tèxtes novèls o alèra d'escrichs oblidats o insufisentament coneguts. Atau, la creativitat podrá ganhar a aquela situacion originala. Cada còp qu'un convisaire tròba quicòm, un biais de dire, un provèrbi, un cònte, un escrich vièlh o novèl, fa un bona òbra en ò transmetre a la redaccion del Convise que difusará. Se pòdon comunicar de novèlas, de renduts-còmptes, d'impressions subre de films, de libres...

Remborsament de las menudas despensas de foncionament, presents als òstes. Se las despensas son leugièiras o se son pas totjorn suportadas pel mèma, es decidat de pas far del remborsament un principi. En mai, la comptabilitat suportariá pas de presents regulièrs als òstes. " L'argent fa fugir l'amistat. " (AM Neuvic)

Module d'animacion. Teatre. JM Gaston prepausa una novèla peçòta siá : Un maridatge mancat, plan comica. J Maurí, Josèp e Margarida Vidal son d'acòrdi per l'interpretar. Anna-Maria Neuvic podriá èstre responsabla del module de teatre. Les participants son convidats a renovelar lor repertòri (cançons, istòrias, còntes, duòs...)

Centenari de la Cabreta en 1995. A la demanda de Sénher Selinge, lo Convise realisará un panèu fasent aparéisser lo ròtle de Raimon Forn dins la primièra Cabreta e prepausará al Felibritge de lo presentar dins una de las exposicions pendent las fèstas del centenari.

Conferéncias, fèsta annadièra. En mai del programa abitual de convises del sabte, lo Convise organisará quauquas conferéncias per contribuïr a la vida culturala cantalesa. La primièira será consacrada a Antonin Dusserre, escrivan d'a Carbonat, e será animada per Pèire Brugèl. Lo principi d'una fèsta annadièra (repais, animacion occitana, repais dançant...) es retengut. Permetrá benlèu de reünir en partida los nombrós pòls de conversacion que se son succedits al Convise.

Nadal Lafont