Editorial n°57        Liste des éditoriaux     Retour accueil     Dernier numéro

Melhors vòts a totes, legeires del Convise. E mai que mai la santat. Qué vàlon las gratificacions de la fortuna o de la cultura quand la malaudiá empacha d'en gausir ?

Saber se la nòstra lenga es en bona santat ? 'Quò's pas lo diable chas nosautres se òm considèra que sa plaça dins l'Educacion Nacionala s'apichonís mas per aver traversat de sègles sens escòla, servat de matisses subjontius e acordat lo participi passat dins una libertat significanta, cal ben que siasca sopla e elastica. Es pas impossible que, un còp despassadas las regdors de restabliment de l'ortografia classica, resistiguèsse mièlhs que d'autras al grand revolum mondialista. D'aquesta ora, lo solelh ven del Càrcin amb las capitadas de la tropa del Trastet e de Patric Delmàs. Meravelhós teatre que permet l'aligança de la literatura e de la raiç populària. La Santa Estèla de Caurs esturlusirà doble.

E lo 17 de març, va i aver Besièrs. Una granda manifestacion en favor de la lenga nòstra es l'ocasion de se durbir a d'autres terraires occitans, de sentir una unitat solidària del miègjorn dins sa varietat. Besièrs, ciutat de bèl relarg miègterranenc, 1209, 1907, l'anciana catedrala Sant Nazari, lo vin, lo rugbí, l'ASB, las arenas, lo canal del Miègjorn, l'amirador, l'Òrb, l'Universitat Paul Valery, lo CIRDOC… las andanas Paul Riquet, la Passejada !

Nadal Lafont

Béziers. Besièrs