Editorial n°55        Liste des éditoriaux     Retour accueil     Dernier numéro

Après un despart matinièr pel puèg Marin, Chailada, Apchon, la sortida de fin d'exercici a menat lo Convise al Scenopargue iÒ ambe lo solelh de junh . L'intencion generala èra de saludar e descobrir aquela realizacion dont Valeta es plan fièr, tot en l'integrar mentalament a la priondor de la montanha cantalesa. Après la pausa de miègjorn a la Foissanta, l'arribada se faguèt per la rota de montanha de Colandras, en majestat : lo Cesalièr a man drecha, l'impausant Sancí en fàcia, la blavor de las Monedièras al ponent, lo Scenopargue al pè !

iÒ es un pargue animalièr plan original vosats als bovides, - tèma plan portat per la vaca de Salèrn en çò nòstre -, que nos parla dels rapòrts entre las bèstias, la natura e l'òme dempuèi las originas endusca a uèi, en nos far pensar a deman. Dins la mitologia grèca, iÒ èra una divinitat que lo dieu Zeus, son amador, tresmudèt en braua blanca per que la preiressa Hera s'entrachèsse pas de res. Mès la gelosa Hera afisquèt un tavan per tormentar la genta vedèla que barrutlèt de per lo monde, franquiguèt la mar Ioniana (nom derivat d'iÒ) a la nada, arribèt al Bosfòr (lo ga de la vaca), en Egipta ont seguèt confonduda ambe Isis e Apis lo buòu sacrat… Uèi un satellit de Jupitèr pòrta son nom…

Un còp passats la bana d'intrada e lo primièr film en relèu, òm es còp sec despaïsat pel campament paleolitic. De las iortas se succediraun cap al lònh de la visita, ambe de films videò, d'obradors apassionants ambe lors animators braves e competents sens folclòr passa-pertot… I aurà l'esclairada neolitica, l'ostal d'Estièine, lo codèrc… Les enfants dintraraun dins la vaca Iolanda per i jogar. Es pas possible de o tot dire, nimai de tot veire dins un après-miègjorn.

Un bèl astre del pargue es l'espandi que vos amaisa, lo paísatge de la Sumena Nalta ont poncheja lo suc de Rond, ambe aqueles plans d'aigas que sémblan en plena natura... Òm se passeja dins lo temps, urós d'entreveire un bison a l'ombra d'un tèrme, intrigat per las banas d'un watusi, emocionat per de cabras d'Angorà, la tèsta plena de buòus musquetats, de rèns, de vacas longhorn o reticas, de iacs, a l'aise al país banut… Per ieu, lo moment lo pus fòrt seguèt quand un bufre d'Asia emergiguèt imprevistament de l'element liquid… l'aiga que se soslèva e… vision chateaubrianesca ! Quand fa caumaci, òm a plaser a se refrescar val fons del pargue ambe de begudas creativas aromaticament apariadas al luòc.

Lo Convise a fòrça presat lo Scenopargue per sa concepcion que vos alarga l'asuèlh cultural e enriquesís lo regard que portam après suls boïns pels prats, per son etica animalièra que va pus lònh qu'un defilat de vacas. Es una realizacion d'importància, segur carestiva de foncionament ambe las còlas d'acuèlh, d'animacion e lo personal veterinari tota l'annada. Quand la senhaletica serà acabada, iÒ serà una referéncia europenca. Que non s'i oblide la lenga regionala per ne'n pas degalhar lo concèpt raufinèl !

Scénoparc iO

.