Editorial n°50        Liste des éditoriaux     Retour accueil     Dernier numéro

Telefònes portables musicals, aparelhs fotò 5 milions de pixèls ambe mini-disc MP3 e web-cam incorporats, camescòpes numerics, esmeral-das, camèus, topazis a portada de las lolitas, es la fèsta de consum que rabís lo monde dins un uni-vèrs claufit de meravilhas naissentas. Tota aquela innovacion fuoquejanta, les nòstres magasins la pòdon pas porgir, mas anar vals bèls centres co-mercials vesins, aquò's fai sortir e aquí avètz la causida. La vida se renovèla, de cranas espicièras coménçan amont de rejónher lo fabre Joan-Bèl. Aimi la gràcia d'aquela carrièra industriala, çò disiá ja lo Guilhèm… I a de gaug. E per nos escarbilhar lo pòrta-moneda, M6 Botiga La Cadena, tanlèu tele-vist tanlèu crompat, pagaretz dins 3 mes. De comandar per Internet, tanben, per mon arma, 'quò' s lèu fach…

E cal pas creire qu'un còp l'article arribat, sètz tot sol. Non pas. L'autre jorn, quauque tusta-barta m'aviá mandat un virús. Tracassat, donère un còp d'uèlh a l'ajuda en linha, bonjorn los escans e las analisas còntra vèrmes e cavals de Tròia… Suprimir los fichièrs temporaris, espepidar los fichièrs compressats, desinstalar, escriure regedit, dintrar dins lo registre e aquí, macarèl, un det a costat podiá ocasionar una pèrdia irremediabla… - una nòta falsa de musica se paga pas tan car - mès finalament tornère instalar, content d'aver retrobat un biais bricolaire de joinesa, de mestrejar mièlhs l'embaissa computica…

O disi sens escarni : fòra los malurs e las injustícias que nos nhàfran, l'umanitat se carra dins aquel monde de tecnica gratificanta. Cossí fai plaser a veire lo nòstre Joan-Maria Gaston, bèl cantoral de l'Auvèrnha vermenosenca, quand zooma de la camerà, tan plan a l'aise coma aquel polisson de Baptiston(1) amb son òsse d'espatla de moton…

Mès, çaquelai, çò qu'aime mai que tot, es de trobar dins la bóstia wanadoo los corrièls mjvb, quatre letras plasentas al present. Abelhòta valenta, cantalesa d'ataca nascuda dins una glèisa tota nuòva, es totjorn aquí, sul tèume que cal, a mandar las novèlas de la lenga, dangièrs e luchas, nos donant l'idèa possibla d'un avenir occitan lumenós…

Bèla gitèla promierenca,

E redolènta, e vierginenca,

Bèla frucha montpelhierenca…

Nadal Lafont

(1) Istòria plasenta de Fernand Prax

 mjvb, occitan et modernité, occitan et progrès, Montpellier, Neuvéglise, nouveaux contextes pour l'occitan, FELCO, enseignement occitan

.