Editorial n°47        Liste des éditoriaux     Retour accueil     Dernier numéro

Quand òm es estat a l'origina d'una fondacion un pauc atipica, òm pòt pas s'empachar d'evaluar son eficiéncia, de far veire son apòrt… e lo rebusatge es pas lònh ! Tiratz, - i tornarai pas pus - vos disi un còp de mai que, ara, la rason d'èsser, l'utilitat culturala e sociala del Convise aparéisson en plen. Après l'espelida en 1987 dins l'I.E.O. e las annadas 90 fruchosas de collèctas e de gaug transmissiva inoblidabla, un peçuc de concurréncia, un castelet de publicacions populàrias, literàrias o sabentas, vaquí que l'Academia dels Jòcs Florals saluda bèlament las edicions del Convise : l'an passat 'quò es lo succès de Zefir Bòsc, felibre chanut, ambe Pescas d'Òlt e, en 2004, Jòrdi Maurici Maurí ambe sas Rabusadas del Suc de la Gana (1999) se vei coronar Prosator Mèstre. Lo meriti creatiu e los onors literaris son per les autors mès lo Convise n'amassa indirectament un pauc per aver asagat la platabanda regionala amb sos corses seguts, son ajuda desinteressada e son dinamisme editorial. L'ajuda de la region Auvèrnha exprimís tanben una reconeissença e d'encoratjaments.

Daissi de caire d'ara endavant aquelses sicuts d'istòria associativa. L'essencial es una conjonccion dels divèrs corrents e movements dins una relacion chalanta de l'occitan al monde actual. Les grands escrivans nòstres, de bèls òmes de mediá coma Andriu Lagarda, Maurici Andriu, z aun fach, e uèi de monde aun aquel besonh, pas tròp ran dels partits, sens regrèt ideologic del passat. Danças, cançons, rire, esperit, plasers de la batuèsta e de l'amor, colors, calors, ambe la lenga, sens vinagre, per pas pèrdre lo ligam ambe lo monde, ambe la vida… Nòstra lenga pòt esposar totes los contorns, totas las invencions beneficas ambe luciditat e paratge dinamic. Tal convise parlant de Praga, d'un monde nuòu, tal article de Peireta Berengier sus Brasilia, tal viatge de Teiriç Òfre, trobador around the word, nos faun signe.