Editorial n°46        Liste des éditoriaux     Retour accueil     Dernier numéro

Dins aqueste numerò, l'airal auvernhat nòrd occitan es un pauc mai representat ambe la contribucion picharandesa d'Eliana Meallet e l'article del muratés Marius Lherme sus son compatriòta Emili Rhodes, escrivan e erudit que sauguèt plan parlar dels país de Limon e de Planesa dins una lenga auvernhata vertadièra e grafiada del bon biais, ja dins las annadas 20, emai quand foguèt installat a Issoire dins lo Puèi de Doma.

La produccion viventa d'Eliana Meallet e lo bon exemple tròp oblidat d'Emili Rhodes me revíudon los prestigis de la nòrd-occitanitat. L'accent cald de l'Auvèrnha bassa al temps de la vendèmia, qual l'a pas ausit coneis pas Occitania ! Ambe la publicacion del Diccionari francés-occitan d'Auvèrnha de Cristian Omelhièr, la Calandreta del Velai, quauquas publicacions remarcablas del Convise e tantas causas convergentas, un reequilibratge natural es a s'acomplir jos nòstres uèlhs. Adiu (1) Parlem, adiu Francés Conheràs ! Quand un poder o una exigéncia istorica comàndon pas, pòt arribar que dels coratjoses se neutralízen o, pus fotut, que la populacion se pèrdia dins una prusor de guirguilhs e qu'òm se demande se l'òme exista, mas, fin finala, la fibra d'òc es totjorn aquí e l'escritura classica plena de ressorças people. Es lo miracle d'aquela cultura, la branqueta de Mistral.

Per èstre pus certan e far concret, seriá bon que las òbras auvernhatas màgers del 63 foguèsson reeditadas dins una grafia adaptada per ne mièlhs marcar l'apertenéncia e avidar legeires e ensenhaires del bon biais .

Nadal Lafont.

(1) fr. Salut ! bonjour !