Editorial n°45        Liste des éditoriaux     Retour accueil     Dernier numéro

En un temps de remenaments bèls de pòbles e de civilizacions, de migracions, de dificultats socialas pus ponhentas que se ditz, de menaças novèlas, ecologicas, politicas, terroristas…, la question de la cultura occitana pòt semblar derisòria dels còps, tant mai que tot se passa sus rèire-plan de populacions embucadas de divertiments.

Al Convise, avèm fach causida de viscar sovent lo monde modèrne en occitan, plasentament, seriosament, sens sectarisme ni tròp se faire d'illusions, ambe les armonics colorats de nòstra cultura, en òme complèt que renèga res, dins lo sentiment que nòstra lenga es polida, portaira d'una rica cultura e que devèm ben quauqua res a los que nos aun metuts al monde.

Al nòstre biais, pas question de téner de prepaus inacceptables o irresponsables. L'aparament de nòstra cultura es inseparable de l'interès general plan soscat que passa per quauqua diversitat intelligenta e non pas la satisfaccion unilaterala d'interès privats amagats.

L'occitan a l'escòla es una question maja per nautres per çò que la transmission familiala se fa quasi pas pus e qu'avèm besonh d'aqueles professors d'escòla, capessians, agregats deman, que òbran sul front de la joinesa e de l'eficiéncia. Mès, agachatz, es tota nòstra societat qu'a besonh de reïnventar son educacion que giba e s'interròja.

Libertat de pensar, independéncia de jutjament, per trobar las bonas sorgas d'energia e comprendre quauques sacrificis, per pas far coma las moscas ni imitar los que seguiáun Napoleòn que prometiá onors, sèxe e argent…

Las colors, ne'n cal, e se tròban pas sonque dins los vestisses o las causas sens significacion. Las politicas de securitat e de santat nos acostúman a la votz del coarro, mas aquí, dificil d'anar còntra, que l'occitanista a pas drech de dire de bestisas. Finalament, mercé d'èstre totjorn aquí, originaus, sens-grades, bolegaires d'un autre monde, bis-sex 'stilats, Joan-Bèl, Paillargue, braconièrs bons crestians sortits d'a cò de Vermenosa !

Cau èstre mau virat per limitar l'expression d'Occitans que vòlon viscar positivament lor cultura uèi e deman, sens abrivar les molins de vent, sens faire de tòrt a degun. Bona annada 2004 !