Editorial n°43        Liste des éditoriaux     Retour accueil     Dernier numéro

Estèt un temps que lo Convise bramava a la grepcha de la reconeissença mès, ara, pòrta marca dins lo païsatge cultural occitan. Quand l'abat Passerat lo cita coma editor a l'Academia dels Jòcs Florals per recompensar Pescas d'Òlt de Zefir Bòsc davant un bèl auditòri vengut d'en pertot, quand las publicacions eruditas de Rogièr Teulat (comentari en òc se vos plai) dels Sermons de Sant-Marçal e del trobador Pèire d'Alvèrnha son agotadas en quauques meses, òm a pas trabalhat per res. E puèi mos dos trabalhs de referéncia sus Vermenosa sémblan considerats durablament coma o díson de contacts estonants, a començar per l'estima e los mandadís de Nicolau Rubió, lo bèl pintor argentin. E passi sus un tapisset d'edicions de totas menas…

Atal plan encaminat, lo Convise va prepausar aquesta annada doas publicacions que revèrton plan sa dobla polaritat iniciala, populària e modèrna. Còp sec, fin de julhet va sortir Quicòm endacòm, un recuèlh de novèlas de Ròc Tarvèl presentat pagina 2 de cobèrta d'aqueste numerò. Segondament, al mes d'octòbre espelirà enfin lo Diccionari carladesenc de Maurici Dèza, collècta sens parièra de mots e expressions de la lenga viva del sègle 20, començada de presentar aicí en pagina 5.

Modestament en far de nòstre mièlhs, transmetèm la vertadièra paraula creativa populària e prepausam una illustracion literària novèla ambe la pensada de l'avenir, pus generosa que l'egoïsme vièlh.

Nadal Lafont.