Editorial n°41        Liste des éditoriaux     Retour accueil     Dernier numéro

Bona annada, plan granada e acompanhada, amics legeires del Convise e autres, titularis, interimaris, precaris, coarros, boièrs grands, intermitents, estagiaris e caumaires. Ò vos desiri seriosament, non pas per simpla cortesia mès per çò que totas las creaturas postéjon lo bonur e que, drama escondut de la vida, les bonurs dels còps se trúcon. Una societat viabla sap far entrelusir un lum. Un esclaire per cadun.

E per nòstra lenga d'Auvèrnha, Lemosin, Aquitània, Provença, Gasconha e encontradas sòrres, desire que se frete a totes les subjècts, que debata de tot, per que foguessiam dels òmes responsables, rescapats de l'escurantisme e de la somission. Vermenosa, rai de sos engatjaments, que d'unes volguèron presentar coma lo cantoral dels limbes, en realitat, li arribava de s'exprimar en lenga d'òc dins la premsa per parlar dels eveniments de son epòca, lo conflicte del Transvaal, la guèrra russò-japonesa, la fogada de l'Alemanha a Tanger en 1905… Es lo camin de sègre ambe los que convíson de geografia siciliana, d'Antiquitat grèca, los que trabàlhon a la socializacion de la lenga, que fan de teatre, de jornals modèrnes en òc, que duèrbon d'escòlas bilingüas e de calandretas…

S'atunís, s'atuda a cha pauc, lo que fa pas passar les apòrts de son temps per 'l'estamina' de son esperit e de sa cultura. Adoncas, que la regionalizacion siaga pas desculturacion e que la lenga d'òc beluguege !

Nadal Lafont