Editorial n°37        Liste des éditoriaux     Retour accueil     Dernier numéro

Resultant de las sciéncias e de las tec-nicas, la mondializacion es en marcha, qué que siàgon los discorses dels uns e dels autres. Probable que los pòbles mens avançats i gan-haraun quauque pauc e se'n cal pas plànger : i a de paure monde que, se víscon uèi dins la misèria, i son per res. Dins los país mièlhs servits, la tèrra es pus bassa que dins lo temps : sovent son d'estrangièrs que faun los trabalhs sasonièrs penibles. Un lent nivelament vendrà benlèu, a poder d'escambis, de migracions, de deslocalizacions…

Dins aquela bèla bolegadissa, la capacitat dels pastres modèrnes a gerir e menar la populacion es impressionanta qué quau sap. Suls catalògs destinats als discaris professionals, per exemple, tot es previst : a tala data, tala ora quitament, i aurà la coa per tal album lo crompar, pr'amor que talas cadenas de TV, talas estelas n'auraun parlat, per çò que la preparacion mediatica montarà a tant de milions… Aquò's un afar que marcha e tot passa plan. Ò disi sens umor : saber amusar los uns, motivar los autres, los contentar ambe juste çò que cal d'insecuritat per una patz sociala relativa, es la marca d'una civilizacion adrecha e poderosa que, per sa mercatica, sos mediàs, parla a la natura umana, capita delà ont d'autras aboquèron e marca tan plan coma l'Empiri roman.

E l'occitan dins aquela pontannada de mutacions que n'avèm pas d'influéncia des-sús ? En tant qu'òmes devèm segur participar a la vida collectiva, en tant qu'Occitans de-vèm manifestar la dignitat de nòstra cultura -al Convise, aver publicat e presentat en lenga d'òc l'òbra de Pèire d'Alvèrnha en 2001 es una audàçia reüssida -, rescontrar los estran-gièrs, butar nòstra lenga a l'escòla e dins los mediàs, organizar, crear, portar un mai d'umanitat e, oblidessiam pas aquò, profitar onestament d'aquel temps qu'es lo nòstre.

Atanben, bona annada 2002 !

Nadal Lafont