Editorial n°36        Liste des éditoriaux     Retour accueil     Dernier numéro

Excusatz, braves legeires, lo picassèl de retard d'aquel numerò 36, fach rare chas nosautres, mès que vos a benlèu inquietats.

Mès regausissètz-vos atanben, per çò que, d'aquel temps, Lo Convise a plan trabalhat : sus la lançada de l'edicion de Pèire d'Alvèrnhe, en mai de las activitats abitualas, avèm conegut un mes d'octòbre fòl ambe las intervencions dins l'encastre de l'annada europèa de las lengas, l'espelida del disc Margarida al país verd, l'Assemblada Generala extraordinària per la melhorason de nòstres estatuts, de tal biais qu'un obrador de danças e un obrador de cançons occitanas son ara alandats tornarmai, sens riscar de s'escartar de la rega occitana. De novèls locals dònon de possibilitats per preparar d'animacions, d'espectacles e menar una vida associativa rica.

Ara, la configuracion orlhaguesa del Convise es atal :

- lo sèti social es totjorn 9 plaça de la Patz ambe lo burèu de las edicions e de la revista. Certanas salas comunas del bastiment associatiu son disponiblas en reservar.

- lo burèu d'animacion e de dança, 14 carrièra Meallet de Cors, es comòde, justa a costat de la bèla sala de dança comuna.

Los convises, las sortidas, la revista, l'ensenhament, las animacions culturalas e festivas, las edicions, los ligamails perméton de portar pus lònh. Qual plaser de legir la letra de Nicolau Rubió que, de Buenos Aires ont se tròba, porgís de documents !

Preséncia locala e espandi cultural, un pauc virats deval denaut a l'endessús de las gelosias, aquò's la rason d'èsser del Convise.