Editorial n°32        Liste des éditoriaux     Retour accueil     Dernier numéro

Amb aquel brandon al bèc, fas pas fasti, mon òme…

(Anna-Maria Neuvic, teatre)

 Qué pensar de Josè Bové lo nòstre campion de la bona manjadissa ? Ieu, coma o pensatz, l'ai a la bona e, cada jorn mai, lo monde pòdon veire que sas rasons son bonas. Dins l'atrasenta Milhau, aquò's una idòla. Mès justament, benlèu que mònta un pauc viste a l'asuèlh dels mediàs… D'unes occitanistas potínhon : l'òme mancariá de modestia, cauriá pas menar la batalha del Ròcafòrt o del fetge gras... Un pauc coma legiguèri fa quauque temps : Nadau (lo famós grop bearnés), n'i a un pete ! D'autres, pus coquinàs : Aimariái lo veire Ministre de l'Agricultura per veire çò que fariá ! 'Quò's lo Pojada dels pacans ! Pecaire, sèm pas d'un país de ganhants e los que faun de l'audimat son pas profètas al vilatge per aquò…

L'autre jorn me trobèri amb un òme que ten d'ordinari un discors scientific liberat de las paurs de nòstre temps e li parlèri d'aquel Marcellin modèrne que sap l'importància del terren mediatic. Soi estabosit per Josè Bové, çò me faguèt : del temps que lo tabat fai 50000 mòrts per an e que la malaudiá de la vaca fòla es implicada dins 4 o 5 cas mortals, aquel òme a totjorn la pipa a la boca a la TV quand nos fa la leiçon alimentària.

Impressionat a mon torn per l'argument mas sachent plan la qualitat de totes los Josès, entreveguèri aquí la matèria problematica d'un article que podiá interessar los legeires del Convise e Jòrdi Maurici Maurí, observaire fin de l'actualitat. Li mandèri un bilhet. Una ora après, recebiái la responsa : lo retrach qu'avètz en pagina 1 de cobèrta, un convit de far un texton d'accompanhament… e la legenda : Pas de fumada sens fuòc.

 Nadal Lafont e Jòrdi Maurici Maurí ( títol e illustracion de cobèrta)