Editorial n°30        Liste des éditoriaux     Retour accueil     Dernier numéro

La prima 2000 es espelida

Lo 1 èr de genièr passat, sèm dintrats en l'an 2000 e un tropèl de professionals de la venda se son fachs un plaser d'ensajar d'engarçar lo bon pòble en li far creire que lo 3 en millenar arribava, qu'aquò èra un eveniment d'una importància grandarassa e que lo caliá festejar pantagruelicament en agotar totas las resèrvas de champanha, s'apetar de fetge gras, s'emplir de caviar, eca. Ara, los meteis publicitaris son prèstes a tornar fotre aquò en afortir que lo 3 en millenar s'alandarà lo 1 èr de genièr 2001. 'Fectivament, un sègle aquò's cent ans, la centena annada compresa e dos millenars, aquò's 2000 ans, la dos milena compresa ; òc ben segur, lo tresen millenar arribarà lo 01-01-01.

Mès a de qué correspóndon totas aquelas datas ? Pels catolics, lo debut de lor èra correspond al jorn que lo prepuci del Crist foguèt extirpat, 8 jorns après la naissença. Pas besonh de dire qu'aquela amira pòt pas contentar las autras religions. Se les ortodòxs son pas gaire lònh darrièr amb 12 jorns de retard, les musulmans, pecaire, dintraraun pas en l'an 1378 que lo 17 de julhet, mentre que les josius elses ne son ja al 4 en o 5 en millenar, per citar solament quauques exemples.

Totas aquelas chinesariás de matematicians e de filosòfs nos dévon pas empachar de capfinar la prima 2000 nimai de levar nalt lo coide lo 1èr de genièr venent, a zerò ora, en l'onor d'un 3 en millenari que existirà al mens virtualament.

Màrius Lherme.