Editorial n°20        Liste des éditoriaux     Retour accueil     Dernier numéro

En 1996, als Quatre Camins, a la fin del convise dels Elevaires del País Vert, Jòrdi Maurí aviá lançada l'idèia d'una fèsta ont seriá designada una joina filha remarcabla per sos ligams amb la cultura occitana, que portariá lo títol de Mionèla per far omenatge a la famosa òbra epica de Joan-Maria Gaston.

Aquela fèsta s'es debanada lo 27 de julhet 97, a Laròcavièlha, comuna natala del poèta, ont sénher Andriu Michard, cònsol, prononcièt un discors pertocant de vertat. La joventa causida es estada Natalia Nureau, pichona filha de Paul Nureau qu'aviá animat lo convise del 15 de septembre 90 a Marmanhac en parlant de la vida del boriaire.

Natalia Nureau es nascuda lo 30 d'abrièu 1975 dins un mitan linguisticament favorable gràcias a sos parents, boriaires a Ferluc de Laròcavièlha e son grand paire, diseire fòrça presat. Al licèu Joan Monnet d'Orlhac, perfeccionèt son occitan escrich ambe Fèliç Daval e auguèt son bachilierat economic e social. A Clarmont d'Auvèrnha, obtenguèt lo BTS d'assistenta de direccion e trabalha ara a la Mutualitat Sociala Agricòla d'Orlhac.

Artista e esportiva, la nòstra Mionèla presa fòrça la fotografia, lo dessenh e s'apassiona pel paracasudisme. Aima belcòp les pichons enfants e se carra d'ajudar sa maire quand recep de mainatjons de l'òbra Lovís Colombant. Per un asard benastruc, aviá donat de leiçons de sosten a Frederic e Elodia, felens de Joan-Maria Gaston que la reconeguèt ambe emocion lo jorn de la manifestacion. Tot aquò li dòna un crane perfil d'assistenta sociala, mestièr que li agradariá plan.

N.L.

Fotò 1 : Mionèla (Natalia Nureau), Joan-Maria Gaston e Jòrdi Maurí.

Fotò 2 : Parlicada de Mionèla. Fotò 3 : Paul Nureau. Fotò 4 : Mionèla.