Editorial n°15 (a)       Liste des éditoriaux     Retour accueil     Dernier numéro

Projècte

Sus la basa dels documents originals que li son estats remetuts e dels estudis menats dempuèi dètz annadas per Lutz et Nadal Lafont, Lo Convise va entreprendre un vaste trabalh d'edicion e de presentacion de certans escrichs occitans cantaleses uèi agotats o inedichs. S'agís de comunicar, en las situar e las explicar, las creacions e las recèrcas d'òmes e de femnas del país que se son investits dins la nòstra cultura e dont las produccions pòdon esclairar nòstre patrimòni tot en facilitar l'ensenhament de la lenga occitana, coma aquò se fai e se vei dins las autras culturas. La raretat dels trabalhs d'aquela mena dins lo Cantal destona un pauc d'alhors al ras de las fòrtas declaracions d'engatjament afortidas dins los mediàs. Aquelas publicacions, notablament avançadas per la documentation o la sasida, deurián èstre acabadas al cap de quatre annadas.

En 96, aquel projècte será pas ajudat pel Conselh General que a decidat de far beneficiar lo sol IEO de la totalitat de l'argent vosat a l'occitan. Mai se lo provèrbi ditz que las pèiras tòmban totjorn suls cairièrs, esperem que pichon a pichon una certana pluralitat culturala serà possibla.

Qué que ne siaga, Lo Convise va contunhar de porgir sa contribucion e d'inscriure durablament son ardenta fe dins lo païsatge d'Auvèrnha. Las publicacions projectadas sortiràn simplament sus de supòrts mens cars e quitament dins de numeròs especials suplementaris de nòstra revista.

Venètz al Convise, vosautres que l'argent encombra pas mès qu'avètz del cur, vosautres que dempuèi quatre ans avètz jos los uèlhs los primièrs testimònis de l'utilitat del Convise.

L'occitan es pas una matèria inèrta.

Nadal Lafont.