Editorial n°12(b)        Liste des éditoriaux     Retour accueil     Dernier numéro

La Calandreta del Vernhat.

La lenga occitana nos porgís a bodre los plasers mès, al delai dels bons moments, cal ben pensar tanben a son avenidor, a sa transmission per la familha e l'escòla.

La calandreta, escòla pels pichons ont l'occitan es lenga ensenhaira (e non pas ensenhada) dins las divèrsas activitats pedagogicas, es una solucion, adoptada dempuèi de las annadas dins lo miègjorn, sul modèl de las Diwan en Bretanha o de las ikastolas al país basque, plan conegudas.

Las calandretas son d'escòlas qualitadosas e eficaças. Mai se d'unes fan semblant de se'n estonar encara, la lenga occitana fa tan plan passar lo contengut de l'ensenhament coma una autra. Dins un segond temps, lèu fach, les escolans apréndon lo francés e, un pauc coma los enfants de la campanha dins lo temps, lo reténon plan mièlhs que los desenraissats. Los mèstres i son pas mai " ecolòs-barbuts " qu'endacòm mai; pàsson lo concors de professors d'escòla e aplícon la ràufia pedagogia de Freinet que dona aquelas amiras que màncan tant uèi per uèi. Coma los efectius son dels còps mens importants que dins las autras escòlas e coma los parents son ganhats a una causa comuna, constituíssion un mitan armoniós, un pauc privilegiat, ont los filhs d'arquitèctas e de medecins son dels còps plan representats, se ne'n crese una marrida lenga benlèu.

Se pòt reprochar justament a las calandretas d'acampar los enfants dins un mitan a despart, de los desseparar dels autres drollets, aquò que lor dona un costat 'escòla privada', mai se praquò son gratuitas, laïcas, finançadas per l'Estat e lors mèstres contingentats als concors. Aquí perqué del monde rapèlon que la circulària del ministre Francés Bairó (1995) rend possibla pertot la creacion d'escòlas bilingüas a la demanda d'un certan nombre de familhas, ambe l'acòrdi del director. Es una autra solucion, pas totjorn la pus aisada pels parents favorables que dévon convéncer los autres.

Los parents áun doncas doás solucions per far aprendre l'occitan a lors pichons dins una França que tira vas l'Euròpa del bon biais. Coma sufís pas de donar las possibilitats per que las causas cambièsson, cal reconéisser la valor e la necessitat dels primadièrs de las calandretas.

Bon astre, doncas, a la Calandreta del Vernhat a Orlhac.

N. L.

Contact : Roland Provenchères, Los Telhs (les Tilleuls), 15220 Sant-Mamet-La-Salvedat (71 64 71 63